Financial assistance for education of children of construction workers : महाराष्ट्रातील बांधकाम क्षेत्रात काम करणाऱ्या नोंदणीकृत बांधकाम कामगारांच्या मुलांसाठी राज्य सरकारची शैक्षणिक मदतीची महत्त्वपूर्ण योजना सुरू आहे. महाराष्ट्र बिल्डिंग अँड अदर कन्स्ट्रक्शन वर्कर्स वेल्फेअर बोर्ड (MBOCWW) मार्फत राबवण्यात येणाऱ्या या योजनेअंतर्गत 1ली ते 7वीपर्यंतच्या विद्यार्थ्यांना ₹2,500 आणि 8वी ते 10वीपर्यंतच्या विद्यार्थ्यांना ₹5,000 इतकी आर्थिक मदत दिली जाते.
ही मदत नोंदणीकृत बांधकाम कामगारांच्या जास्तीत जास्त दोन मुलांसाठी, तसेच नोंदणीकृत पुरुष कामगाराच्या पत्नीला (ती 1ली ते 10वीपर्यंत शिकत असल्यास) मिळू शकते.
कोणाला मिळणार शैक्षणिक आर्थिक मदत?
या योजनेसाठी अर्ज करण्यासाठी संबंधित कामगार बांधकाम किंवा इतर कन्स्ट्रक्शन कामात प्रत्यक्ष कार्यरत असावा आणि वेल्फेअर बोर्डामध्ये नोंदणीकृत असणे आवश्यक आहे. लाभ घेणारे मूल किंवा कामगाराची पत्नी 1ली ते 10वीच्या कोणत्याही वर्गात शिकत असणे बंधनकारक आहे.
अर्ज प्रक्रिया?
अर्ज प्रक्रिया पूर्णपणे ऑफलाइन असून इच्छुक अर्जदारांनी MBOCWW च्या अधिकृत वेबसाइटवरून अर्ज डाउनलोड करावा. आवश्यक माहिती भरल्यानंतर सर्व कागदपत्रांच्या प्रती जोडून श्रम आयुक्त किंवा शासकीय श्रम अधिकाऱ्यांकडे अर्ज सादर करावा. अर्ज केल्यानंतर पावती घेणे आवश्यक असून त्यामध्ये सबमिशनची तारीख, वेळ आणि संदर्भ क्रमांक नमूद केलेला असतो.
हेही वाचा : व्हॉट्सॲप संदेशांमुळे सायबर गुन्ह्यांचे प्रमाण वाढले; “एक क्लिक तुमचे बँक खाते रिकामे करू शकतो”.
कोणती कागदपत्रे लागतात?
अर्ज करताना आधार कार्ड, पासपोर्ट फोटो, बँक पासबुक, शाळेचे 75% उपस्थिती प्रमाणपत्र, महाराष्ट्र बांधकाम कामगार मंडळाचे ओळखपत्र आणि निवासाचा पुरावा जोडणे आवश्यक आहे.
राज्यातील अनेक बांधकाम कामगारांसाठी ही योजना मुलांच्या शिक्षणाचा खर्च भागविण्यासाठी दिलासा देणारी ठरत असून कामगार कल्याण विभागाकडून पात्र लाभार्थींना लवकरात लवकर अर्ज करण्याचे आवाहन करण्यात आले आहे.
हेही वाचा : महाराष्ट्रातील विधवा महिलांना दरमहा ₹१५०० देणारी योजना, अर्ज करण्यासाठी ‘ही’ कागदपत्रे आवश्यक.
