PM Surya Ghar Solar Subsidy : सर्वसामान्यांना वीजबिलातून दिलासा देण्यासाठी केंद्र सरकारने ‘PM सूर्य घर मोफत वीज योजना’ सुरू केली असून या योजनेअंतर्गत दरमहा 300 युनिटपर्यंत मोफत वीज देण्याची घोषणा करण्यात आली आहे. घराच्या छतावर सोलर पॅनल बसवणाऱ्यांना थेट सबसिडी देऊन सरकार मोठा फायदा देत आहे.
या योजनेत 1 किलोवॅट सोलर सिस्टीमसाठी सुमारे ₹30 हजार, 2 किलोवॅटसाठी ₹60 हजार आणि 3 किलोवॅटसाठी तब्बल ₹78 हजारांपर्यंत अनुदान दिले जात आहे. देशभरातील सुमारे 1 कोटी कुटुंबांना या योजनेचा लाभ देण्याचे लक्ष्य ठेवण्यात आले आहे.
सबसिडी मिळवण्यासाठी सर्वप्रथम अधिकृत पोर्टलवर नोंदणी करावी लागते. त्यानंतर ग्राहक क्रमांक आणि मोबाईल नंबरद्वारे लॉगिन करून सोलर सिस्टीमसाठी अर्ज करावा लागतो. डिस्कॉमकडून फिजिबिलिटी मंजुरी मिळाल्यानंतर नोंदणीकृत विक्रेत्याकडून सोलर प्लांट बसवला जातो. इंस्टॉलेशन पूर्ण झाल्यावर नेट मीटरसाठी अर्ज करून तपासणी प्रक्रिया पूर्ण होते.
पडताळणी झाल्यानंतर पोर्टलवर कमिशनिंग प्रमाणपत्र तयार होते आणि त्यानंतर अर्जदाराने बँक तपशील अपलोड केल्यावर 30 दिवसांच्या आत सबसिडी थेट खात्यात जमा केली जाते.
या योजनेचा लाभ घेण्यासाठी इच्छुकांनी अधिकृत वेबसाइटवर जाऊन ऑनलाइन अर्ज करावा. तसेच ऑफलाइन नोंदणीसाठी पोस्ट ऑफिसमध्येही सुविधा उपलब्ध आहे.
सरकार या संपूर्ण प्रकल्पासाठी सुमारे ₹75 हजार कोटी खर्च करणार असून, यामुळे वीजबिलात मोठी बचत आणि हरित ऊर्जेला चालना मिळणार आहे.
