Transgender Loan Scheme Maharashtra : तृतीयपंथीयांच्या आर्थिक उन्नतीसाठी महाराष्ट्र शासनाच्या सामाजिक न्याय व विशेष सहाय्य विभागाकडून ‘बीज भांडवल योजना’ सुरू करण्यात आली असून जळगाव जिल्ह्यातही या योजनेची अंमलबजावणी सुरू झाली आहे. पात्र लाभार्थ्यांनी या संधीचा लाभ घ्यावा, असे आवाहन समाजकल्याण विभागाने केले आहे.
१३ मार्च २०२६ च्या शासन निर्णयानुसार, तृतीयपंथीयांना आर्थिकदृष्ट्या सक्षम बनवणे आणि स्वयंरोजगाराच्या संधी उपलब्ध करून देणे हा या योजनेचा मुख्य उद्देश आहे. पारंपरिक रोजगाराच्या मर्यादित संधींमुळे भेडसावणाऱ्या अडचणी दूर करण्यासाठी ही योजना महत्त्वाची ठरणार आहे.
या योजनेअंतर्गत लाभार्थ्यांना ₹25 हजार ते ₹2 लाखांपर्यंत कर्ज मिळणार आहे. यामध्ये ४५ टक्के शासन अनुदान, ५० टक्के बँक कर्ज आणि ५ टक्के लाभार्थ्यांचा स्वतःचा हिस्सा असे वित्तीय मॉडेल आहे. नियमित कर्जफेड करणाऱ्यांना व्याजात ३० टक्क्यांपर्यंत सवलतीचीही तरतूद आहे.
महत्त्वाचे म्हणजे या कर्जासाठी कोणत्याही प्रकारचा जामीनदार किंवा तारण आवश्यक नाही. त्यामुळे आर्थिकदृष्ट्या दुर्बल तृतीयपंथीय व्यक्तींना व्यवसाय सुरू करणे अधिक सोपे होणार आहे.
या योजनेतून लघुउद्योग, सेवा व्यवसाय, किरकोळ व्यापार, हस्तकला, शिवणकाम, ब्युटी पार्लर, मोबाईल दुरुस्ती, खाद्यप्रक्रिया आदी क्षेत्रांत व्यवसाय सुरू करण्यास प्रोत्साहन दिले जाणार आहे.
योजनेसाठी अर्जदाराचे वय १८ ते ५० वर्षे दरम्यान असावे आणि तो/ती महाराष्ट्राचा किमान १० वर्षांचा रहिवासी असावा. तसेच तृतीयपंथीय ओळखपत्र सादर करणे आवश्यक आहे. इच्छुकांनी सहायक आयुक्त, समाजकल्याण कार्यालय, जळगाव येथे अर्ज सादर करावेत, असे आवाहन सहायक आयुक्त योगेश पाटील यांनी केले आहे.
या योजनेमुळे तृतीयपंथीय समाजाला आर्थिक बळकटी मिळून सन्मानाने जगण्याची नवी संधी निर्माण होणार आहे.
