पालघर जिल्ह्यातील वसई येथे मत्स्य प्रशिक्षण केंद्र उभारण्यासाठी जागा तातडीने निश्चित करण्याचे निर्देश मत्स्यव्यवसाय व बंदरे मंत्री नितेश राणे यांनी दिले.
या संदर्भात मंत्रालयात आयोजित बैठकीत संबंधित विभागांना प्रस्ताव महसूल विभागाकडे पाठवण्याच्या सूचना देण्यात आल्या. बैठकीस आमदार स्नेहा दुबे, मत्स्यव्यवसाय आयुक्त प्रेरणा देशभ्रतार तसेच इतर अधिकारी उपस्थित होते.
मंत्री राणे म्हणाले की, या प्रशिक्षण केंद्रामुळे स्थानिक युवकांसाठी रोजगाराच्या नव्या संधी निर्माण होतील. त्यामुळे प्रकल्पाची अंमलबजावणी लवकरात लवकर पूर्ण करणे आवश्यक आहे. तसेच मुख्यमंत्री मत्स्यसंपदा योजना याबाबत व्यापक जनजागृती करून अधिकाधिक मच्छीमारांना याचा लाभ मिळावा, असेही त्यांनी सांगितले.
बैठकीत मुरुड-जंजिरा परिसरातील कोळी समाजाच्या विविध मागण्यांवरही चर्चा करण्यात आली. मच्छी सुकविण्यासाठी जागा, जाळी व बोटी दुरुस्ती केंद्रे, कोळी खेड्यांचा विकास तसेच पर्यटनवृद्धी यांसारख्या मुद्द्यांवर विचारविनिमय झाला.
‘बॅक वॉटर’ प्रकल्पाच्या माध्यमातून आवश्यक पायाभूत सुविधा निर्माण करण्यासाठी पर्यटन व मत्स्यव्यवसाय विभागाने संयुक्त प्रस्ताव तयार करावा, असे निर्देशही देण्यात आले. यासाठी जिल्हाधिकारी स्तरावर सर्व संबंधित विभागांची बैठक घेण्यास सांगितले आहे.
तसेच मच्छीमार संस्थांना विविध शासकीय योजनांची माहिती देण्यासाठी विशेष शिबिरांचे आयोजन करण्यावर भर देण्यात आला आहे. या उपक्रमामुळे मत्स्य व्यवसाय क्षेत्राला चालना मिळून स्थानिक अर्थव्यवस्थेला बळ मिळेल, अशी अपेक्षा व्यक्त करण्यात आली.
हेही वाचा: आरोग्य योजनांचे एकत्रित व्यवस्थापन लागू होणार; रुग्णांना मिळणार जलद आर्थिक मदत – मुख्यमंत्री फडणवीस.
