महाराष्ट्रात डेटा सेंटर क्षेत्रात मोठ्या गुंतवणुकीची शक्यता निर्माण झाली असून मध्य पूर्व आशियासह जगभरातील अनेक नामांकित कंपन्या राज्यात येण्यासाठी उत्सुक आहेत. या पार्श्वभूमीवर मुख्यमंत्री देवेंद्र फडणवीस यांनी संबंधित कंपन्यांना त्वरित जागा उपलब्ध करून देण्याचे निर्देश दिले.
सह्याद्री राज्य अतिथीगृह येथे झालेल्या बैठकीत डेटा सेंटर प्रकल्पांबाबत सादरीकरण करण्यात आले. या बैठकीस उद्योग मंत्री उदय सामंत दूरदृश्य प्रणालीद्वारे उपस्थित होते. तसेच CIDCO चे व्यवस्थापकीय संचालक विजय सिंघल आणि ऊर्जा विभागाच्या अपर मुख्य सचिव आभा शुक्ला यांसह वरिष्ठ अधिकारी उपस्थित होते.
मुख्यमंत्री फडणवीस यांनी सांगितले की, करार झाल्यानंतर डेटा सेंटर प्रकल्पांसाठी जमीन उपलब्ध करून देण्याची प्रक्रिया कालबद्ध पद्धतीने पूर्ण करावी. तसेच या कंपन्यांना वीज उपलब्धता प्राधान्याने देण्यावरही त्यांनी भर दिला.
यासाठी सिडकोमार्फत लँड बँक विकसित करण्याचे आणि ऊर्जा विभागाने सबस्टेशनसाठी आवश्यक जागा त्वरित उपलब्ध करून घेण्याचे निर्देश देण्यात आले.
दरम्यान, डेटा सेंटर प्रकल्पांसाठी आवश्यक पायाभूत सुविधा तयार करण्यात येत असल्याची माहिती सिडकोकडून देण्यात आली. तसेच ऊर्जा विभागाने कंपन्यांसाठी पुरेशा वीजपुरवठ्याची व्यवस्था करण्यात येत असल्याचे स्पष्ट केले.
या प्रकल्पांमुळे महाराष्ट्रात मोठ्या प्रमाणात गुंतवणूक वाढण्यासोबत रोजगारनिर्मितीलाही चालना मिळण्याची अपेक्षा आहे.
हेही वाचा: वीज व्यवस्थापनात AI चा वापर वाढवा; उन्हाळ्यातील पीक डिमांडसाठी सरकार सज्ज – मुख्यमंत्री देवेंद्र फडणवीस.
