नागपूरमधील नॅशनल कॅन्सर इन्स्टिट्यूट परिसरात उभारल्या जाणाऱ्या भारतदुर्गा मंदिराचा शिलान्यास उत्साहात पार पडला. या मंदिरातून देशभर नवचेतना जागृत होऊन समाजाला प्रेरणा मिळेल, असा विश्वास मुख्यमंत्री देवेंद्र फडणवीस यांनी व्यक्त केला. या सोहळ्याला नितीन गडकरी यांची विशेष उपस्थिती होती.
डॉ. आबाजी थत्ते सेवा आणि अनुसंधान संस्था यांच्या वतीने उभारण्यात येणाऱ्या या मंदिराचा शिलान्यास मोहन भागवत यांच्या हस्ते करण्यात आला. शिलान्यासानंतर आयोजित धर्मसभेत विविध धर्मगुरू व मान्यवर उपस्थित होते.
मुख्यमंत्री फडणवीस म्हणाले, नागपूरमध्ये एकाच दिवशी आरोग्य आणि अध्यात्म या दोन्ही क्षेत्रांतील महत्त्वाचे प्रकल्प सुरू होत आहेत. नॅशनल हेल्थ केअर इन्स्टिट्यूटसारख्या अत्याधुनिक रुग्णालयासोबत भारतदुर्गा मंदिराची उभारणी ही समाजाला शक्ती आणि भक्ती दोन्हीची प्रेरणा देणारी ठरेल. मंदिरातील मूर्ती नवचेतना जागृत करून सकारात्मक ऊर्जा निर्माण करेल, असेही त्यांनी नमूद केले.
नॅशनल कॅन्सर इन्स्टिट्यूटबाबत बोलताना त्यांनी सांगितले की, गरीब रुग्णांना दर्जेदार कर्करोग उपचार उपलब्ध करून देण्याच्या उद्देशातून ही संस्था उभारण्यात आली असून, आता त्याच परिसरात उभारले जाणारे मंदिर अध्यात्मिक उर्जेचे केंद्र ठरेल.
यावेळी केंद्रीय मंत्री नितीन गडकरी म्हणाले, भारतदुर्गा मंदिराचा शिलान्यास हा नवभारत निर्मितीसाठी प्रेरणादायी टप्पा आहे. नागपूर देशाच्या मध्यवर्ती ठिकाणी असल्यामुळे हे मंदिर देशभरातील नागरिकांसाठी सहज पोहोचण्याजोगे आणि प्रेरणादायी केंद्र ठरेल.
हेही वाचा: भटके-विमुक्त समाजासाठी त्रिस्तरीय समित्या; अत्याचार प्रकरणांवर तातडीची कारवाई – मंत्री अतुल सावे.
