महाराष्ट्र उद्योगस्नेही धोरणांमुळे जागतिक गुंतवणूकदारांसाठी पसंतीचे केंद्र बनत असून राज्याची ‘ग्लोबल इन्व्हेस्टमेंट हब’ म्हणून ओळख अधिक बळकट होत असल्याचा विश्वास मुख्यमंत्री देवेंद्र फडणवीस यांनी व्यक्त केला. ‘वर्षा’ निवासस्थानी भारतातील डेन्मार्कचे राजदूत रास्मुस अबिलगार्ड क्रिस्टेन्सेन यांनी घेतलेल्या सदिच्छा भेटीदरम्यान गुंतवणूक, बंदर विकास आणि हरित तंत्रज्ञानावर सविस्तर चर्चा झाली.
या बैठकीत महाराष्ट्रातील बंदर विकास, शिपिंग, ऊर्जा आणि पाणी व्यवस्थापन क्षेत्रातील संधींवर भर देण्यात आला. वाढवण बंदर प्रकल्पाची माहिती देताना मुख्यमंत्र्यांनी सांगितले की, हा प्रकल्प राज्याला जागतिक सागरी नकाशावर अग्रस्थानी नेण्यास मदत करेल. लॉजिस्टिक्स आणि निर्यात वाढीसाठीही हा प्रकल्प निर्णायक ठरणार आहे.
राज्यात जलवाहतूक व्यवस्थेला चालना देण्यासाठी वॉटर टॅक्सी प्रकल्प राबविण्याचा निर्णय घेण्यात आला असून, इलेक्ट्रिक फेरी आणि इलेक्ट्रिक वॉटर टॅक्सी तंत्रज्ञानासाठी डेन्मार्कच्या कंपन्यांसोबत भागीदारी करण्याची तयारी असल्याचे मुख्यमंत्री फडणवीस यांनी स्पष्ट केले. यामुळे मुंबई–कोकण किनारपट्टीवरील प्रवास अधिक वेगवान आणि पर्यावरणपूरक होण्याची अपेक्षा आहे.
यावेळी डेन्मार्कचे राजदूत क्रिस्टेन्सेन यांनी त्यांच्या देशातील इलेक्ट्रिक फेरी सेवांचा अनुभव शेअर करत, हे तंत्रज्ञान महाराष्ट्रासाठी उपयुक्त ठरू शकते, असे सांगितले. सध्या डेन्मार्कच्या सुमारे ६० कंपन्या मुंबई आणि पुणे परिसरात विविध क्षेत्रांत कार्यरत असून भारत–डेन्मार्क ग्रीन स्ट्रॅटेजिक पार्टनरशिप अंतर्गत महाराष्ट्र महत्त्वाचा भागीदार ठरेल, असा विश्वास त्यांनी व्यक्त केला.
