राज्यातील एमबीबीएस विद्यार्थ्यांसाठी मोठा दिलासा मिळण्याची शक्यता निर्माण झाली आहे. वैद्यकीय शिक्षण मंत्री हसन मुश्रीफ यांनी विकास शुल्कातील बदल तसेच एसईबीसी प्रवर्गातील विद्यार्थ्यांना ओबीसीप्रमाणे शैक्षणिक शुल्क सवलत देण्याबाबत शासन सकारात्मक असल्याचे सांगितले.
मंत्रालयात झालेल्या आढावा बैठकीत 2024-25 आणि 2025-26 या शैक्षणिक वर्षांसाठी शुल्क संरचनेवर चर्चा करण्यात आली. या बैठकीस वैद्यकीय शिक्षण व संशोधन संचालनालयाचे आयुक्त अनिल भंडारी तसेच संबंधित अधिकारी आणि विद्यार्थी संघटनांचे प्रतिनिधी उपस्थित होते.
मंत्री मुश्रीफ यांनी सांगितले की, एमबीबीएस विद्यार्थ्यांवर वाढत्या खर्चाचा ताण लक्षात घेऊन विकास शुल्कात बदल करणे आवश्यक आहे. तसेच सामाजिक व शैक्षणिकदृष्ट्या मागास (SEBC) विद्यार्थ्यांना ओबीसी प्रवर्गाच्या धर्तीवर शुल्क सवलत देण्याचा विचार शासन स्तरावर सुरू आहे.
या संदर्भात उच्च व तंत्रशिक्षण विभाग आणि इतर मागास बहुजन कल्याण विभागाशी चर्चा करून अंतिम निर्णय घेतला जाणार आहे. विद्यार्थ्यांच्या हिताला प्राधान्य देत शिक्षण अधिक सुलभ आणि परवडणारे करण्यासाठी शासन कटिबद्ध असल्याचेही त्यांनी स्पष्ट केले.
बैठकीत शासकीय व खासगी वैद्यकीय महाविद्यालयांच्या शुल्क रचना, विद्यार्थ्यांची आर्थिक परिस्थिती आणि शैक्षणिक सुविधांचा दर्जा यांचाही सविस्तर आढावा घेण्यात आला.
हेही वाचा: एकल महिलांसाठी ‘वन-स्टॉप’ सेवा; सर्व योजना एकाच छताखाली देण्याचे निर्देश – आदिती तटकरे.
