महाराष्ट्रात उद्योगस्नेही धोरणांमुळे मोठ्या प्रमाणावर गुंतवणूक वाढत असून राज्यात उद्योगांचे नवे पर्व सुरू झाल्याचे मुख्यमंत्री देवेंद्र फडणवीस यांनी सांगितले. श्याम स्टील आणि JW Global उद्योग समूहांनी राज्यात मोठ्या गुंतवणुकीचे सामंजस्य करार (MoU) केले आहेत.
वर्षा निवासस्थानी झालेल्या बैठकीत या गुंतवणुकीची घोषणा करण्यात आली. मुख्यमंत्री फडणवीस यांनी सांगितले की, राज्यात उद्योग सुरू करण्यासाठी प्रक्रिया सुलभ करण्यात आली असून गुंतवणूकदारांना पूर्ण सहकार्य दिले जात आहे.
पश्चिम बंगालमधील Shyam Steel समूह चंद्रपूर जिल्ह्यातील गोडपिंपरी येथे सुमारे 10 हजार कोटींची गुंतवणूक करून स्टील प्रकल्प उभारत आहे. या प्रकल्पातून 8 हजारांहून अधिक रोजगार निर्माण होणार आहेत.
तसेच JW ग्लोबल समूह राज्यात सुमारे 1.65 लाख कोटींची गुंतवणूक करणार आहे. सोलापूर जिल्ह्यातील उजनी धरणात फ्लोटिंग सोलर प्रकल्पासाठी जवळपास 14,976 कोटींची गुंतवणूक केली जाणार असून 500 रोजगार निर्माण होतील.
याशिवाय ग्रीन हायड्रोजन, डेटा सेंटर, आर्टिफिशियल इंटेलिजन्स कॅम्पस आणि स्मॉल मॉड्युलर न्यूक्लिअर रिऍक्टरसारख्या प्रकल्पांमध्येही गुंतवणूक होणार आहे. या सर्व प्रकल्पांमुळे राज्यात सुमारे 3 हजार अतिरिक्त रोजगार निर्माण होण्याची अपेक्षा आहे.
मुख्यमंत्री फडणवीस यांनी सांगितले की, राज्यात गुंतवणूक करणाऱ्या उद्योगांना सर्वतोपरी सहकार्य केले जाईल आणि महाराष्ट्राला उद्योग क्षेत्रात आघाडीवर ठेवण्यासाठी शासन कटिबद्ध आहे.
