Tata Mumbai Marathon ही केवळ धावण्याची स्पर्धा नसून समाजात सकारात्मक बदल घडवणारा प्रभावी मंच असल्याचे मत राजशिष्टाचार व पणन मंत्री जयकुमार रावल यांनी व्यक्त केले.
मुंबईतील ट्रायडेंट हॉटेलमध्ये आयोजित ‘ग्रॅटिट्यूड कार्यक्रमात’ मॅरेथॉनसाठी योगदान देणाऱ्या मान्यवरांचा सत्कार करण्यात आला. यावेळी बोलताना रावल यांनी, “ही धाव अंतरासाठी नाही, तर बदलासाठी आहे,” असे म्हणत या उपक्रमाचे कौतुक केले.
दोन दशकांपूर्वी Procam International यांनी सुरू केलेली ही मॅरेथॉन आज जागतिक दर्जाची स्पर्धा बनली आहे. यासोबतच ती एक मोठे परोपकारी व्यासपीठ म्हणूनही उभी राहिली आहे. या मॅरेथॉनमधून आतापर्यंत तब्बल ७५०० कोटी रुपयांहून अधिक निधी उभारण्यात आला असून, यावर्षीच सुमारे ७६० कोटी रुपये जमा झाले आहेत.
या उपक्रमाचा सामाजिक प्रभाव स्पष्ट करताना रावल यांनी Magic Bus India Foundation आणि Akshaya Patra Foundation यांच्या कामाचा उल्लेख केला. या संस्थांनी वंचित घटकांतील मुलांना शिक्षण, जीवनकौशल्ये आणि पोषण सुविधा उपलब्ध करून देत त्यांच्या आयुष्यात सकारात्मक बदल घडवला आहे.
या मॅरेथॉनमुळे महाराष्ट्राला जागतिक स्तरावर ओळख मिळाली असून, ६० हून अधिक देशांतील सहभागामुळे राज्याची मोठ्या प्रमाणावर आयोजन करण्याची क्षमता अधोरेखित झाली आहे. हा उपक्रम विश्वास, सामाजिक परिवर्तन आणि भारताच्या क्षमतेचे प्रतीक असल्याचे रावल यांनी नमूद केले.
हेही वाचा: एसटीचा तोटा कमी करण्यासाठी मोठे पाऊल; सुधारणा आराखड्याचे निर्देश – परिवहन मंत्री प्रताप सरनाईक.
