नागपुरात मध्य भारतातील रुग्णांसाठी जागतिक दर्जाच्या आरोग्य सुविधांचा मोठा प्रकल्प साकार होणार असून ४६१ बेड क्षमतेच्या अत्याधुनिक मल्टी स्पेशालिटी व सुपर स्पेशालिटी रुग्णालयाचे भूमिपूजन पार पडले. देवेंद्र फडणवीस, नितीन गडकरी आणि मोहन भागवत यांच्या प्रमुख उपस्थितीत हा कार्यक्रम झाला.
धरमपेठ येथील नॉर्थ अंबाझरी मार्गावर डॉ. आबाजी थत्ते सेवा व अनुसंधान संस्था तर्फे उभारण्यात येणारे ‘नॅशनल हेल्थ केअर इन्स्टिट्यूट’ हे मध्य भारतातील अत्याधुनिक आरोग्य केंद्र ठरणार आहे. सुमारे २३ मजली इमारतीत उभारण्यात येणाऱ्या या प्रकल्पात हेलिपॅड आणि एअर ॲम्बुलन्सची सुविधा उपलब्ध असणार आहे.
सुमारे पाच लाख चौरस फूट क्षेत्रावर उभारल्या जाणाऱ्या या रुग्णालयात हृदयरोग, न्यूरोलॉजी, नेफ्रॉलॉजी, युरोलॉजी, क्रीडा वैद्यक, प्लास्टिक सर्जरी तसेच जेरियाट्रिक आणि रूमेटोलॉजीसारख्या सुपर स्पेशालिटी सेवा उपलब्ध होणार आहेत. अवयव प्रत्यारोपण सुविधा आणि विशेष बर्न वॉर्ड यावरही विशेष भर दिला जाणार आहे.
या प्रकल्पाचे डिझाइन सिंगापूरमधील आंतरराष्ट्रीय दर्जाच्या वास्तुविशारद संस्थेकडून तयार करण्यात आले असून मेडिकल प्लॅनिंगला विशेष प्राधान्य देण्यात आले आहे. तसेच या संस्थेमध्ये पदव्युत्तर आणि सुपर स्पेशालिटी वैद्यकीय शिक्षणासाठी अत्याधुनिक शैक्षणिक सुविधा देखील उभारल्या जाणार आहेत.
या प्रकल्पामुळे नागपूरसह संपूर्ण मध्य भारतातील रुग्णांना अत्याधुनिक आणि गुणवत्तापूर्ण आरोग्य सेवा स्थानिक स्तरावर उपलब्ध होणार असून मोठ्या शहरांवर अवलंबून राहण्याची गरज कमी होण्याची अपेक्षा व्यक्त केली जात आहे.
हेही वाचा: पु. ल. कट्ट्यावर अन्नपूर्णा देवी जन्मशताब्दी निमित्त मानवंदना; ‘A-6 आकाशगंगा’ लघुपटाचे प्रदर्शन.
