धुळे जिल्हा प्रशासनाने विकसित केलेल्या कृत्रिम बुद्धिमत्ता (AI) आधारित ‘ई-सुविधा’ पोर्टलचे लोकार्पण मुख्यमंत्री देवेंद्र फडणवीस यांच्या हस्ते शिरपूर येथे पार पडले. या उपक्रमामुळे जिल्हा प्रशासनाचा कारभार अधिक वेगवान, पारदर्शक आणि नागरिकाभिमुख होणार असल्याचे मुख्यमंत्र्यांनी यावेळी सांगितले.
कार्यक्रमाला पालकमंत्री जयकुमार रावल, वस्त्रोद्योग मंत्री संजय सावकारे तसेच जिल्हाधिकारी भाग्यश्री विसपुते यांच्यासह स्थानिक लोकप्रतिनिधी उपस्थित होते. या अभिनव उपक्रमाबद्दल मुख्यमंत्र्यांनी जिल्हा प्रशासनाचे विशेष कौतुक केले.
जिल्हाधिकारी भाग्यश्री विसपुते यांनी सांगितले की, राज्यातील ई-गव्हर्नन्स सुधारणा उपक्रमांच्या पार्श्वभूमीवर धुळे जिल्ह्यात हे AI आधारित व्यवस्थापन पोर्टल विकसित करण्यात आले आहे. तहसील ते मंत्रालय स्तरापर्यंत प्रशासन अधिक कार्यक्षम करण्यासाठी हे पोर्टल उपयुक्त ठरणार आहे.
या प्रणालीमुळे नागरिकांच्या विविध शासकीय कामांना गती मिळणार असून अर्ज प्रक्रिया, सेवा वितरण आणि तक्रार निवारण अधिक सुलभ होणार आहे. विशेष म्हणजे, अशा प्रकारचा AI आधारित जिल्हा व्यवस्थापन पोर्टल विकसित करणारा धुळे हा देशातील पहिला जिल्हा ठरला आहे.
हेही वाचा: देशाच्या प्रगतीत विधि शिक्षणाची भूमिका निर्णायक – जिष्णु देव वर्मा.
