Ladki Bahin Yojana Ekyc Update Maharashtra : राज्यातील महिलांसाठी राबवली जाणारी ‘मुख्यमंत्री माझी लाडकी बहीण’ योजना सध्या चर्चेत आहे. या योजनेतुन पात्र महिलांना दरमहा 1500 रुपयांची आर्थिक मदत दिली जाते. मात्र, नवीन अर्ज प्रक्रिया पुन्हा सुरू होणार का, याबाबत अनेक महिलांमध्ये संभ्रम निर्माण झाला होता.
या पार्श्वभूमीवर महिला व बालविकास मंत्री अदिती तटकरे यांनी स्पष्ट केले आहे की, सध्या या योजनेसाठी नवीन अर्ज नोंदणी सुरू करण्यात आलेली नाही. त्यामुळे नव्याने अर्ज करू इच्छिणाऱ्या महिलांना सध्या प्रतीक्षा करावी लागणार आहे.
दरम्यान, आधीच अर्ज केलेल्या महिलांसाठी eKYC प्रक्रिया अनिवार्य करण्यात आली आहे. काही लाभार्थींनी eKYC करताना चुका केल्याचे आढळल्याने शासनाने दुरुस्तीची संधी दिली आहे. संबंधित महिलांना 30 एप्रिलपर्यंत eKYC अपडेट करण्याची मुदत देण्यात आली आहे.
eKYC प्रक्रियेदरम्यान फसवणुकीच्या घटनाही समोर आल्या आहेत. जळगाव येथे eKYC करून देण्याच्या नावाखाली एका महिलेसोबत गैरवर्तन झाल्याची घटना उघड झाली आहे. या प्रकरणी पोलिसांनी गुन्हा दाखल करून तपास सुरू केला आहे.
याबाबत मंत्री अदिती तटकरे यांनी महिलांना सावध राहण्याचे आवाहन केले आहे. कोणत्याही मध्यस्थावर विश्वास ठेवू नये, आमिषांना बळी पडू नये आणि eKYC प्रक्रिया स्वतः मोबाईलवरून किंवा अंगणवाडी सेविकांच्या मदतीनेच पूर्ण करावी, असे त्यांनी स्पष्ट केले.
हेही वाचा: ‘या’ शेतकऱ्यांना मिळणार नाहीत 2000 रुपये; लगेच करा हे काम.
